Ajangizen festa parte-hartzaileen eredu izan nahi dute

Bezperada egunarekin jai egunak hasiko dira gaur Ajangizen (Bizkaia). Zahagiaren igoerarekin hasten dira festak. Hala dute usadioa. Beñat Erezuma kultura eta jai zinegotziak txikitatik ezagutzen du ohitura hori: «Gernikan Ajangizko jaiak hasiko zirela ohartaraztera joaten ginen Errenteriara, bolanderekin». Gernika-Lumoko auzo hori garai batean Ajangiz zela dio. Hango zubitik herrigunera bitarteko bidea autoz egiten dute egun, zahagiarekin. Hainbat geldiune egiten dituzte bidean, eta horietako bakoitzean ardoa izaten dute edari. «Urtero izaten da jendetsua, baina iazkoa itzela izan zen».

Aparteko giroarekin hasten dira, bada, Ajangizko jaiak; herritarren parte-hartzearekin. Hain zuzen, horrela definitzen ditu Erezumak: parte-hartzaileak eta herrikoiak. Ajangizen orain bost urtera arte, beherakada izan zuten jaiek, herri gehienetan bezala. Erezumaren esanetan, azkenaldian garrantzi berezia ematen hasi dira auzoetako jaiei ere, adibidez Gernika-Lumon. Eta tamainaz txikiak diren herriek ere erakartzeko gaitasuna berreskuratu dute. «Egia da herri bakoitzeko errealitatea desberdina dela, baina, oro har, bai, indarra hartzen ari dira». Indar hori parte-hartzetik datorrela dio. Eskualdeko herri askotan herritarrek jaiak herritarrek kudeatzen dituztela azpimarratu du, eta udalak jai batzordea errespetatu eta laguntza ematen diela. «Jaietan eta beste esparru batzuetan herriko bizia kudeatzeko beste eredu batera joan beharko ginateke», hausnartu du.

Egitaraua

GAUR

20:00. Briska txapelketa eta txokolate jana.

BIHAR

22:00. Kontzertuak: Jake-mate, Deskontrol eta Joxpa.

ETZI

18:00. Umeen jolasak.

19:00. Mus txapelketa eta, ondoren, sardina jana.

ETZIDAMU

11:00. Mezaren ondoren, dantzak.

12:00. Txakolin eguna eta, ondoren, herri bazkaria.