Amurrioko jaiak luze eta bizi doaz

Jaietako laugarren eguna ospatuko dute gaur Amurrion (Araba). Ostegunean hasi zen jaia Iguarrako txoriaren jaitsierarekin, eta ordutik jaia ez da gelditu. Kuadrillen eta haurren egunak pasata, gaur, kulturaren eguna ospatuko da.

Denentzako aukera dago Amurrion; izan ere, egitarau oparoa prestatu ohi dute jaietarako. Ostiralean umeen eguna izan zen, eta larunbatean, kuadrillena; gaur, berriz, kulturari eskainiko diote jaia. Sukaldaritza, kirola eta musika nagusituko dira egun osoan.

Kirolzale goiztiarrentzat, txirrindularitza sari nagusia izango da 09:30ean. Ordu berean, marmitako lehiaketa hasiko da Juan Urrutia plazaren inguruan. Marmitakoa sutan den bitartean, baserriko produktuen erakusketa eta lehiaketa ikusteko aukera izango da plazan. Giroa animatzeko, trikitilariak ibiliko dira kalez kale.

13:00etan, txirrindulari lasterketako sariak banatuko dira. Ordu berean, marmitako lehiaketako kazolen aurkezpena egingo da. Menua dastatu ostean, sari banaketa egingo da. Arratsaldean atsedenareko tartetxo bat egongo da, eta, 18:30ean, izkingileen lehiaketa izan da.

Jasokundearen bezpera izanik, herriko zaindariari loreak eskainiko dizkiote. Jarraian, bertsokupela egongo da, errima eta sagardoa uztartuz, festarako bidelagun paregabeak baitira biak. Gauean, Esne Beltza taldeak kontzertua emango du, Hor Konpon taldearen erromeriari jarraiki.

Bihar, Jasokundearen eguna ospatuko dute amurrioarrek, eta etzi San Rokerena. Aurten, festak luzatu nahian, errepikapena egingo dute asteazkenean.