Prozesioa, zonbiak eta hirugiharra

Sanferminek eta zeluloideak duten loturaz solastatzen hasita, zonbien pelikulak dira hizketaldian azaleratzen lehenak. Izan ere, hildako ibiltarien pelikula batek izan behar dituen elementu guztiak betetzen dira Iruñean: nora ezean dabilen jende saldoa, kaosa, suntsiketa, gizarte arauen baliogabetzea, odola...

Imajina dezagun une batez kutsatzea —beti baitago kutsatze bat— Jarauta kalean hasten dela. Poliziaburu gizen eta ahobero batek, tentazioari eutsi ezinda, haginkada ematen diola konfiskatutako hirugihar zati bati. Handik ordu gutxira, lerdea dariola agertzen da komisarioa uztailaren 7ko prozesioan, eta eraso egiten die alkateari eta zinegotziei. Izurritea hedatu egiten da, eta, berehala, zonbi bihurtuak dira politikariak, artzapezpikua, La Pamplonesako musikariak, eta baita kilikiak ere. Uztailaren 14rako, lurrean botatako gorpu zatiak besterik ez lirateke geldituko. Turista australiar bat soilik libratuko litzateke filmaren bukaeran. «Zer moduz sanferminetan?», galdetuko liokete etxera itzultzean. «Ongi», erantzungo lieke. «Urtero bezala».