Asier Sanzen lana hautatu dute Trumpen erretratuen antologiarako

Asier Sanz ilustratzaile eta umoregile grafiko bilbotarrak iaz argitaraturiko erretratuak arreta bereganatzen du oraindik. Fake Views; The Donald Trump Book of Covers AEBetako presidenteari eginiko irudi antologiaren azalerako aukeratu du Ben Arogundade idazle ingelesak, «originalena» delakoan. Sanzek banana batekin eta mortadela puskekin osatu zuen erretratua, besteak beste. «Nire erronka sintesirik handiena sortzea da. Errora joatea bilatzen dut collage hauekin, pertsonaiaren funtsa adierazi», esan du Sanzek.Besteak beste, Time, The New Yorker, The New York Times, The Economist eta Der Spiegel argitalpenetako lehen orriak bildu dituzte liburuan. «Ohorea da, ikusita zelako lehia dagoen azal bikain horiekin».