Balio ekologikoak sustatu, naturarekiko harremana berreskuratze aldera

Aurreko belaunaldiei gertatzen ez zaiena gertatu ohi zaie egungo haurrei: ez dute inguruko natura ezagutzen. Hutsune hori betetzera dator Irrien Lagunak klubaren egitasmoa. Zuhaitzen balio pedagogikoa goraipatu dute ekimenaren antolatzaileek, eta pertsonek zuhaitzetatik ikasteko asko dutela aldarrikatu. Proiektua Aieteko inguruarekin ondo islatzen dela uste du Joxe Mari Agirretxe Irrien Lagunak klubeko kideak. «Euskal Herrian mundu osotik etorritako pertsonak bizi gara. Batzuk bertan sortu gara, beste batzuk kanpotik etorri zaizkigu. Parkean ere kanpotik etorritako zuhaitzak daude, eta gu horiekin aberastu egiten gara. Denek daukagu zerbait emateko, eta zerbait jasotzeko, bai pertsonek bai zuhaitzek». Euskaratik, umorez eta balio ekologikoetan oinarritutako egitasmoa dela azaldu dute Irrien Lagunek.