Amador Tolosa pasaitarra bizikletazale eta bildumagile amorratua da —bizikletena ez ezik, antzinako autoen eta motorren zalea ere bada, eta kartel bilduma aipagarria dauka—. Tolosa afizionatu mailan lehiatu zen garaiko Matxain, Urkizar, Agirretxe, Lasa, Otaño eta enparauekin. 60ko hamarkadan hasi zen bizikleta zaharrak erosten, Frantziara egiten zituen bidaietan. 100 bizikletak baino gehiagok osatzen dute haren bilduma pertsonala, eta kutunenak eta berezienak daude erakusketan, Tolosak berak atzoko aurkezpeneko bisita gidatuan azaldu zuenez: belozipedoak, trizikloak, XIX. eta XX. mendeetan Frantziako Tourraren lehen aldietan erabilitako bizikletak, eta baita Txomin Perurena, Fernando Escartin eta Samuel Sanchez txirrindulariek Tourrean erabili zituztenak ere. «Urteetako lanaren eta ilusioaren emaitza da, eta ohorea da niretzat museoan egotea», azaldu zuen Tolosak.
Bost ataletan banatu dute erakusketa, bizikletari lotutako bost alderdi ezberdin aintzat hartuta: ofizioak, historia eta bilakaera, kiroletakoak, Euskal Herrian sortuak, eta haur eta gazteentzako bizikletak. Ofizioenean, lanbide ezberdinetan erabilitako zazpi bizikleta daude ikusgai; besteak beste, postariek eta suhiltzaileek erabilitakoak, eta baita guardia zibilek erabilitako bizikleta bat ere, Mauser fusila koadroan zintzilik duela —1914koa da atal horretako zaharrena—.
Historiaren eta bilakaeraren atala da oparoena: 26 bizikleta daude. 1860an ekoitzitakoa da atal horretan zaharrena, eta hiru mendetakoak daude ikusgai:AEBetakoak, Alemaniakoak, Frantziakoak, Erresuma Batukoak eta Italiakoak, besteak beste.
Euskal Herrian sortutako bizikleten atalean, XX. mendeko hamasei bizikleta daude, BH, GAC, Orbea eta Razesa marketakoak, eta esplikatzen dutenola sortu zen Euskal Herrian bizikletaren inguruko industria oparo eta berria armagintzaren industria krisian sartu zenean.
Susana Soto zuzendariaz eta Amador Tolosa bildumagileaz gain, Bingen Zupiria Eusko Jaurlaritzako Kultura eta Hizkuntza Politikako sailburua, eta Eneko Goia Donostiako alkatea ere izan ziren aurkezpenean. Biek nabarmendu zuten txirrindularitzak tradizio handia izan duela Euskal Herrian, eta erakusketa ikusi besterik ez dagoela horretaz ohartzeko.
Gaur irekiko dute, eta hitzaldi bat ere antolatu dute (19:00). Ander Izagirre kazetariak emango du, Euskal txirrindulariak Tourraren historian izenburupean.
