Euskaldun berrientzako bertsolaritza eskolak

Orain lau urte hasi zuten esperimentua, eta arrakastatsua izan da emaitza. Urtero izan ditu ikasleak geroztik Iruñeko Hizkuntza Eskolako bertso eskolak. Euskaldun berriak dira eskola horretako ikasleak, eta bertsogintzari buruzko oinarrizko ideiak ikastea da helburua. Ainhoa Aranburu bertsolariak emango ditu eskolak. Datorren astean abiatuko da ikastaroa, eta bihar itxiko dute izena emateko epea. Bertsotan egin dute gonbita: «Bertsotan nola egin/ nahi baduzu jakin,/ Hizkuntza Eskolan gaude/ etorri gurekin!».

Maiatzera arte astean bi orduz arituko dira euskaldun berriak bertso eskolan. Hizkuntza mailaren araberako bi talde osatuko dituzte antolatzaileek, baina hutsetik hasiko dira biak. Bertsolaritzaren bidez ikasleen ulermena eta ahozko adierazkortasuna lantzea eta hobetzea da xedea.