Hacker vs Cracker

Joko bat proposatuko dizuet, istorio bat; bi rol izango ditugu, baina zuen eskuetan geldituko da rol bakoitza egokitzeko aukera.

Hauek dira bi rolen definizioak —Wikipediatik aterata—:

Hacker ordenagailuen adituak definitzeko erabiltzen den terminoa da. Dena dela, bere esanahia interes zehatz bat —eta jaiotzetiko gaitasuna— duten pertsonei zabaldu ohi zaie.

Cracker bat sistema informatiko baten segurtasuna urratu nahi duen pertsona da, hacker baten antzera, baina, horiek ez bezala, onura pertsonalak edota sistema mintzea dute helburu.

Istorioa, berriz, hau da: HBGary segurtasun enpresako buruak, Anonymous-eko buruak zein ziren argitzen saiatuko zela adierazi zuen. Horrekin batera, hainbeste informazio interesgarri zabaltzea lortu duen Wikileaks ere amaitzeko aldarria ere egin zuen. Horiek amaitzeko infiltrazioak, estrategia teknologikoak, soziologikoak eta abar erabili behar zirela ere argudiatu zuen, baita martxan jarri ere—nahiz eta etikoak ez izan—.

Horren ostean, Anonymous taldeak HBGary-ren buruarenposta elektronikoan sartzea lortu zuten, eta denon eskura jarri zituzten bertako mezuak. Mezu horiek bere enpresaren aldeko erabakiak hartzeko hainbat estrategia ez legalak, zibermatxinadak saihesteko zenbait proposamen ematen zituzten argitara.

Horretaz gain, IBMrekin eta AEBetako aire armadarekin batera garatzen ari diren tresna baten berri ere izan dugu. Metal Gear du izena, sarean eta batez ere sare sozialetan pertsona batek egindako mugimenduak aztertu eta harremanak topatzea da haren helburua. Pertsona horiek detektatu eta beren aurka egiteko. Baina, gainera, tresnak sare sozial, blog, foro eta abar erabiliz profil faltsuak antola ditzake. Ondoren, profil horiek sarean sortzen diren zibermatxinada edota aurkako iritziak kontrolatzeko erabiliko dituzte. Tresna automatiko horren bidez, pertsona batek hainbat profil faltsu kontrolatu, eta manipulazio estrategiak aurrera eraman ahal izango dituzte alegia.

Batzuetan, badirudi gure moralak eskatu ohi digun on eta txarren arteko lehia ez dela argiegia. Hala ere, hau joko bat zen, eta nik argi daukat nola banatuko nituzkeen rolak, baina zuei dagokizue orainaukeratzea.