'Historiaurrearen abentura Gipuzkoan' erakusketa, zabalik

Historiaurreak testigantza aberatsa utzi du Gipuzkoan; hala erakusten du atzodanik San Telmo museoan zabalik den erakusketak: Historiaurrearen abentura Gipuzkoan. Aranzadi zientzia elkarteak, Ekain Berrik eta Foru Aldundiak antolaturik hainbat hitzaldik lagunduko dute erakusketa. Gaur bertan da lehena. Juan Luis Arsuaga Atapuercako zuzendaria lehenengo gizakien inguruan ariko da, 19:30ean. Bihar, berriz, Alvaro Arrizabalaga Leze Txiki eta Irikaitzeko aztarnategietako zuzendariak hitz egingo du. Datozen egunetan, Xabier Peñalver eta Sonia San Jose (Intxur aztarnategia); Josean Mujika eta Jose Migel Edeso (hileta errituak); eta Diego Garate zein Marcos Garcia (labar artea Gipuzkoan) ariko dira hitzaldi sorta interesgarria osatuz.