Ostiralean, 30 urte beteko dira Euskadi Irratiak bere emisioak hasi zituela. Eta urteurrenaren harira, datorren astean hainbat ekitaldi antolatu dituzte. Asteartean eta asteazkenean, Irratia Euskaraz jardunaldiak egingo dituzte, Donostiako Koldo Mitxelenan (19:00). Aurreneko egunean Felipe Juaristi Euskadi Irratiko zuzendariak egingo du aurkezpena; ondoren, atzoko eta gaurko irratiaz mintzatuko dira Koldo Ordozgoiti kazetaria eta Arantza Gutierrez irakaslea. Asteazkenean, Joseina Etxeberria Gazteako esatariak eta Xabi Erkizia musikariak etorkizuneko irratiaz hitz egingo dute. Ondoren, Anjel Alkain aktoreak eta Jose Luis Padron Euskadi Irratiko esatariak irratiko bost ezaugarriren inguruan irudimen eta umorez eginiko performancea eramango dute oholtza gainera.
Ostiralean, urteurreneko egunarekin bat eginez, ekitaldi berezia egingo dute Donostiako San Telmo museoan, 19:00etan. Hiru sari banatuko dituzte: Gertu saria emango diote entzule leialenari, Irratia saria 30 urteotako irratsaio nabarmenenari, eta Fideltasun saria iragarkiak betidanik jarri dituenari. Dora Salazarren grabatu bana jasoko dute.
Komunikazioa
'Irratia Euskaraz' jardunaldiak egingo dituzte datorren astean Donostian
Euskadi Irratiaren 30. urteurrenaren harira, atzoko, gaurko eta biharko irratiaz hitz egingo dute
Iruzkinak
Ez dago iruzkinik
Ordenatu