Azken hamar hilabeteetan beheraka egin du ETB2ko batez besteko kuotak, abuztuko salbuespenarekin -hilabete horretan puntu erdia irabazi zuen-. Urrian, berriz, hiru hamarreko galdu ditu kateak irailarekin alderatuz. 2009ko urrian, berriz, lau puntu eta lau hamarreko gehiago zituen kateak.
Datu eskasak ari dira eskuratzen ETBko zuzendaritzaren apustuak: Uyyyyy!, Euskadi Directo eta A2 (lehengo Aspaldiko). Berriki estreinatu duten Consumidores-ek %5,5eko batez bestekoa du. Nahiko fin dabilen bakanetakoa El Conquistador del Aconcagua da, baina hala ere El Conquistador del fin del mundo-ren datuetatik urrun samar.
Gauzak horrela, ETB2 kateak bere ikuslegoaren %45 inguru galdu du EITBko zuzendaritza berria iritsi zenetik.
ETB1ek % 1,9ko kuota
ETB2ko datuak txarrak dira, eta ETB1ekoak ez dira hobeak. Urrian %1,9ko ikusle kuota izan du euskarazko kateak, aurreko hilean baino hamarreko bat gehiago. Iazko urriarekin alderatuz, aldiz, puntu bat galdu du. Urtez urte ari da beheraka egiten ETB1: 2003an %6,2ko ikusle kuota izan zuen, iaz %3raino jaitsi zen. Eta aurten inoizko datu txikienetara erori da.
Denboraldi honetarako Arratsaldero magazinea da ETB1eko apustu garrantzitsuena. Lehen asteetan %1eko kuotaren inguruan dabil.
ETB3n haur programazioaren aldeko apustua egin dute, ETB1eko marrazki bizidunak bertara pasatuz. Urrian %0,5eko batez besteko kuota izan du ETB3k, irailean baino bi hamarreko gutxiago.
Tele5k ditu ikusle gehien Araban, Bizkaian eta Gipuzkoan (%18,9).
Espainian, La1 da liderra (%15,2), eta bigarren tokian dago Tele5 (%14,7). La2ek bere historiako datu eskasena izan du urrian: %2,3.
