Kultur ekitaldiz beteriko egitaraua dute betekizun oraindik ereBaigorrin (Nafarroa Beherea), eta, Aste Santuko oporrez baliaturik, etorkizunaren inguruko gogoeta saio bat eta antzerki, poesia zein musika ikuskizuna antolatu dituzte gaurko eta biharko.
Herrian bizi, herria biziarazi... izenburupean, gogoeta gaualdia egingo dute gaur, Lasako gelan, 20:30ean. Basaizea, Euskaldun Gazteria eta Adur elkarteek antolatu dute, Baigorri eta antzeko herri txikien geroarekin kezkaturik. Hainbat galdera jarriko dituzte mahai gainean, egoera zein den eta nola jokatu behar den argitzeko asmoz: «Zer da herriaren biziaraztea? Zein baldintza falta zaizkigu oraindik herri biziaren indartzeko ?». Tokiko ekimenak lurraldearentzako egitasmo orokor bati lotu behar zaizkion eztabaidatuko dute. Indarrak bateratuz gero, nola antolatu beharko litzatekeen ahalmen hori eta gazteei zer toki eman behar zaien aztertuko dute. Hautetsiekin nolako lotura egin eztabaidatuko dute, eta, amaitzeko, bizi-kalitateaz «sakonki» hausnartuko dute.
Bihar, 19:00etan, Bil Etxea zinema aretoan, Gabrielen lekua Gabriel Arestiren pertsona eta haren lanaren inguruko ikuskizuna taularatuko dute Andoni Egañak, Oier Guillanek eta Rafa Ruedak eta Ainhoa Alberdik.
KULTURALDIA 2014
Noiz. Gaur, 20:30ean.
Non. Lasako Gelan, Baigorrin.
Kulturaldia, Baigorrin
Baigorriko Kulturaldian herriaren geroaren inguruko gogoeta egingo dute gaur, Lasako Gelan
Iruzkinak
Ez dago iruzkinik
Ordenatu
