Ainhoa herri miresgarria abiapuntua eta helmuga, Lapurdiko hiruzpalau mendixka ezagut daitezke
allande sokarros
Ainhoako elizatik bertatik (125 m) hasiko gara ibiltzen, horren inguruan den hilerriaren parean abiatzen den bidetik. Berehalaxe topatuko dugun bide gurutzunean zuzen jarraituko dugu, Arantzetako kaperarako bidea seinalatzen duten pankartei arreta emanda. Bi kilometro eskas eginda eta une batean ibilbidea nahiko aldapatsua izango delarik, Arantzetako ermitara helduko gara (390 m). Hemendik, dagoeneko, Ainhoa hiriari eta inguru zabalei begira, bista zoragarria gozatzeko aukera izango dugu.
Kaperatik aukera bat baino gehiago bada aurrera segitzeko. GR-10 bide seinalatuak ipar ekialderantz jotzen du, eta beste xenda batek hego ekialderat ematen du. Mendietan ibiltzea ohituta daudenek, ordea, bi aukera horien ordez... erdiko ibilbide bat aukeratuko dute Erebi mendixka politaren ekialdeko gandorraren gora eginda, nahiko zut, haatik. Ulergaitza da zergatik, bada, GR-10 xenda seinaledunak saihets egiten dion gailur gozagarri honi (583 m). Egia da behin gorantz egin ondoren apurtxo bat jaitsi behar dela Hiru Gurutzeen lepora iristeko (513 m). Hemen, gurutzerik ez bilatu, ez baitaude. Horien ordez, baina, ehizarako lekuak badaude, sobran ere...
Lepo honetan ere bi aukera daude aurrera egiteko. Hala, bide harriztatu batek eskuin alderat jarraitzen du -GR-10 hortik dabil- eta xenda batek ezkerrerantz. Hemen ere, bi aukera horiek bazter utzita, Atxulegiren ekialdeko bizkarraren gora joango gara, damugarri baita hegi polit honi eta bere gailurrari (618 m) muzin egitea. Bizkarraren haritik, lehen saihestutako bide harriztatura jaitsiko gara, eta Gaineko bordako aterpearen alboan igaro ondoren, Zuharreteako lepora heltzeko (566 m).
BIZKAILUZEKO HEGITIK. Urrezti mendiaren hegoaldeko maldaren azpian kokatua den garate honetatik aitzina, aurreko aldi batean aipagai izan genuen Ezkondrai, Mondarrain, Gorospil ibilbideko zati bat baliatuko dugu. Aldi hartan egin genuen bezala, hementxe ere GR-10 ibilbide seinalatuari saihets egingo diogu, Bizkailuze hegiaren haritik jarraitzeko. Zuharreteako lepotik malda belartsuaren gora goxo-goxo igo ondoren, ordoki lau dagoen hegi honetan ibiliko gara, egundoko ikusmen miresgarria gozatuz une oro. Luzeegia litzateke aipatzea bizkar honetatik begi-bazka ditugun gune eta gailurrak. Bakan batzuk izendatzearren, haatik, ekialdean oso hurbil, baina Laxiako sakanaren beste aldean Artzamendi potoloa ezagutuko dugu. Hego mendebaldera, berriz, lerro-lerro ezagutuko ditugu, besteak beste, Atxuria, Saiberri, Ibanteli, Larrun, Aiako Harria....
Bizkailuzeren hegoaldeko muturrean, zedarri txiki batek seinalatzen du Gorospil gailurrean gaudela (691 m). Horren mendebaldeko gandorraren haritik egingo dugu behera, zati nahiko zut baten ostean, Haizagerriko bizkarretik goxoagoa eraisten jarraituko dugularik. Arrotxenbordarako bidean, mapan izenik eman ez dioten muino baten gainetik (293 m) igarotzeko edo horren iparraldeko maldatik aurrera doan xendatik ibiltzeko aukera daukagu. Kasu batean zein bestean, Arroxenborda baserri albotik iraganen garaeta hortxe berehala egingo dugu topo Lapitxuri erreka politarekin.
Hemendik aurrera, horren saihetsetik ibiliko gara bide harriztatu batean eta Lapurdi eta Nafarroaren arteko mugaren haritik. Bide batekin topo egitean, haatik, zuzen segituko dugu Dantxarinea auzunera (70 m) heltzeko gisan. Muga egiten duen zubira eramaten duen errepidea zeiharkatuta, pare-parean daukagun karrika hartuko dugu, erabat iparralderat eta gorantz jota. Horrela, ordu erdi batean, Ainhoara helduko gara, eta herri miresgarri horren bisitatzeko nahikoa denbora ere izango dugu, zehaztu dizuegun ibilbide hau lau ordu eta erdiz egiteko moduan baita.
