Atzo, Marijaia erre aurretik, Aste Nagusiaren balorazioa egin zuen Bilboko Udalak. Jaiek 80 milioi euroko inpaktu ekonomikoa eduki dutela kalkulatu dute eta milioi eta erdi lagun elkartu direla.
Hotelek %85-87ko okupazioa izan dute, batez beste, eta batzuk erabat beteta ere egon dira. Igandeko datuak falta dira oraindik, baina larunbatetik larunbatera 18.000 bisitariri egin diete harrera turismo bulegoan.
Juan Mari Aburto alkateak jakinarazi zuen lau eraso sexista salatu dituztela jaietan, eta pertsona bat atxilotu dutela, horietako kasu batekin lotuta. Atzo bertan, elkarretaratzea egin zuten ehunka lagunek Bilboko Konpartsek deituta, eraso horiek salatzeko.
