11:30ean hasiko da Konpartsakide Eguna, pintxo txapelketarekin. Bilboko konpartsek antolatu ohi duten lehiaketa gastronomikoak berezitasun bat du aurten. Pintxoak hiru osagai izan behar ditu derrigorrez: espinaka, tomatea eta piperra. Ondoren, 12:00etan, barazki eta sagardo banaketa egingo da. Ordu horretan bertan, askotariko ardoak dastatzeko aukera egongo da.
12:30erako, Elkarlan uholdearen tourra antolatu dute konpartsek. Hori izango da aurtengo aldiaren berritasuna. 1983ko Aste Nagusian, uholdeak gertatu ziren Bilbon; ezbeharraren 40. urteurrenean, konpartsek gogora ekarri nahi dute garai gogor horretan egon zen «elkarlan uholdea».
Bazkaldu aurretik, 13:00etan, umeen txanda izango da. Gastrotxiki ekitaldia egingo da estreinakoz, Areatzan. 13:30ean, konpartsek pintxoak aurkeztu behar dituzte. Eguerdiko 14:30 aldera jakinaraziko dute nor den aurtengo lehiaketa gastronomikoaren irabazlea, eta sariak banatuko dituzte. Sabelak betetzeko orduan, 15:00etan, konpartsen arteko bazkaria egingo dute Areatzan bertan.
Bazkalostean, musikak bere tokia izango du. 17:00etan, bingo musikatua izango dute konpartsetako kideek. Horren ostean, 19:00 inguruan hain zuzen, Urrats Erromeriak dantzan jarriko du Areatza.
Aste Nagusiaren atarian antolatzen da Konpartsakide Eguna, giroa berotzeko eta konpartsakideek gozatzeko. Eneritz Enderika konpartsakideak ilusio handiz hartzen du biharko eguna: «Iaz, pandemiaren ondorengo lehen Konpartsakide Eguna ospatu zenez, jende pilo bat etorri zen, eta aurten ere hala izatea nahi dugu: jende asko bertaratzea eta disfrutatzea».
Uholdeen 40. urteurrena
1983ko abuztuaren 25etik 27ra, urak gainezka egin zuen Bilbon. Uholdeak izan zirenean, Aste Nagusia ospatzen ari ziren Bizkaiko hiriburuan. Hain zuzen ere, bosgarren aldia izan zen hura. Euriteek kalte handiak eragin zituzten Areatzaren inguruetan. Kalte horiek arintzeko, konpartsa kideen eta gizarte zibilaren elkarlana ezinbestekoa izan zen.
Bihar Konpartsakide Eguna ospatuko dela baliatuta, ibilaldi historiko bat egingo dute. Enderikak adierazi duenez, helburua izango da garai horretako konpartsen eta auzokideen elkarlana gogoratzea: «Gure ideia da Karmelo Landak gidaritzapean ibilaldi historiko bat egitea Ibaizabal itsasadarra hartuta, San Anton zubitik abiatuz udaletxeraino». Garai hartan, Landa konpartsakidea zen, eta Jai Batzordeko kidea.
Uholdeen inguruko argazki erakusketa bat ere egongo da Areatzan. Leku berean, kamisetak eta poltsak salduko dituzte.
