Oi! eta punk doinuak Azkoitian

Punk eta oi! doinuak nagusi izango dira gaur Azkoitian Info7ko Kaleko mobida saioko kideek antolatu duten jaialdian. Hasteko, 17:00etan, hiru taldek joko dute Txarrantxa tabernan: Achtung (Hernani), The Last Strenght (Goierri) eta Karbunko (Lleida, Katalunia). Azken talde horrek punk doinuak jotzen ditu 2003. urtetik. Bere azken diskoa duela bi urte argitaratu zuten: Hazte camino. Genio biziz betetako punk-rockeko hamalau doinuz osatua dago lan hori.

22:30 aldera, berriz, Matadeixe gaztetxean kontzertua izango da Gipuzkoako hiru talderekin: Doubling Boys (Bergara), Cold Revenge (Bergara) eta Frydays Crew (Urola). Aurreneko taldeak skinhead rock-and-roll estiloko kantak jotzen ditu; bigarren taldearen estiloa «punk-oi! mozkorra» gisa definitzen dute; eta hirugarren taldea ere punk-oi! estiloan kokatzen da.

Kontzertuen ostean, DJ lehia izango da Kaleko mobida saioko kideen eta Reggae Fever-ekoen artean.

Kaleko mobida irratsaioa asteazken gauetan entzun daiteke Info7 irratian, 23:00etan. Ekaitz Etxezarreta da programako gidaria, eta bertan punk eta oi! estiloko doinuak izaten dira nagusi. Interneten saioak badu bere orria.

'KALEKO MOBIDA FEST 2'

Noiz. Gaur, 17:00etan hasita.

Non. Azkoitian (Gipuzkoa). Arratsaldeko kontzertuak Txarrantxa tabernan izango dira, eta gauekoak, Matadeixe gaztetxean.