Shanghaiko neonen distira lausoan, Blossoms Shanghai telesailak denboraren hariari helduko dio, eta 1960ko hamarkadatik XXI. mendearen lehen urratsetarainoko bidaia poetiko bat egin. Kontakizuna 90eko hamarkadan abiatuko da, Shanghaiko burtsa irekitzearekin batera; gorakada ekonomiko ikaragarri baten abiapuntua da, aukera eta arriskuz beteriko aro baten ataria.
Ah Bao izango da istorioaren bihotza, Ge Hu aktore txinatarrak antzeztuko duen pertsonaia: telesailak erakutsiko du nola utziko duen pobrezia alde batera eta nola bilakatuko den finantza munduko enpresaburu boteretsu. Haren gorakadak hiriaren beraren eraldaketa islatuko du, norbanakoaren eta metropoliaren arteko ispilu joko gisa. Wong Kar-Waik bere sinadura estilistikoari eutsiko dio: egitura zatikatua, flashback-en dantza malenkoniatsua, barne bakarrizketen xuxurlak eta ia onirikoa dirudien giro estetiko bat uztartuko ditu.
30 ataletan, Ah Baoren ibilbideari jarraituko dio istorioak, eta funtsezko hiru emakumerekin dituen harremanak ere erakutsiko ditu. Emakume horiek protagonistaren bizitzako ideal nagusien sinbolo izango dira: maitasuna, abentura, ohorea eta errugabetasuna.
Bere estiloari leial izanda, Wong Kar-Waik irudiak emozio bilakatzen dituen obra biziki estetiko bat eraiki du. Plano bakoitza arretaz ehunduta dago, pintura baten modura: neonezko argiek dirdira amesgarria sortzen dute, itzal leunek isilpeko drama iradokitzen dute, kristal lausotuek eta pertsonaien islek denboraren eta distantziaren zentzua desitxuratzen dute. Kolorea da filmaren hizkuntza nagusia: tonu okreak, berde itzaliak, gorri sakon eta sutsuak... Alde horretatik, Shanghai ez da toki errealista gisa aurkezten, baizik eta ebokazio estilizatu modura.
Ikusleak hasieratik ulertu behar du Blossoms Shanghai ez dela telesail konbentzional bat, baizik eta esperientzia sentsorial bat: malenkoniaz tindatutako bidaia bisual bat da, patxadaz gozatzekoa. Lehen atalak erritmo geldoz eta estilo berezi batez josten dira, eta ez da erraza haien tonura egokitzea. Baina, behin barrura sartuta, zentzumenei heltzen dien eta hipnosira eramaten duen obra bihurtuko da.
Zinemagileak, bere film ezagunetan bezala, denboraren igarotzeak pertsonengan eta lekuetan uzten duen aztarna miatuko du lan honetan ere: nola lausotzen diren oroitzapenak, nola moldatzen diren harremanak...
AEBetako telesail gehienen egitura zuzenetik eta erritmo bizkorretik urrun, Blossoms Shanghai-k bere nortasun propioa dauka: pasarteak patxadaz ehuntzen ditu, sentsazioak poliki eraikitzen, pertsonaiak geruzaz geruza garatzen eta testuinguru soziokulturalaren marrazki xehea josten du.
Telesailak 55 minutuko 30 atal izango ditu —guztira 25 ordu!—, eta lehenengo hamabostak ekainean estreinatu dituzte; astero bost atal berri eskainiko dituzte Filminen.
Trilogiaren amaiera
Wong Kar-Waik zuzendu dituen In the Mood for Love eta 2046 egile zinema garaikideko film garrantzitsuenetako bi dira, eta maitasuna, nostalgia eta denboraren joana aztertzen dituzte. Lehena estetikoki dotorea eta emozionalki sotila da, eta harreman ukiezin bat kontatzen du 1960ko hamarkadako Hong Kongen; bigarrenak, berriz, Chow idazlearen bizitza eta oroitzapenak aztertzen ditu, zientzia fikziozko narrazioekin nahasita. Blossoms Shanghai telesailak amaiera ematen dio trilogia horri.
fitxa
- Sortzailea. Wong Kar-Wai.
- Herrialdea. Hong Kong.
- Urtea. 2023.
- Aktoreak. Kenny Bee, Hu Ge, Ma Yili, Tang Yan, Xin Zhilei, Ryan Zheng eta You Benchang.
- Non ikusi. Filmin.
- Atal bakoitzaren iraupena. 55 minutu.
- Generoa. Drama.
