Txotxongiloen magia

Sestao herriari tokatu zaio aurten Txotxongilo Eguna antolatzeko ohorea. Guztira hamabi konpainia izango dira, bihar hasi eta igandera arte, haur nahiz helduen imajinazioa martxan jarri eta bidaia magikoetan murgilarazteko arduradunak.

Ikuskizun gehienak euskaraz izango dira, eta herriko hainbat lekutan antzeztuko dituzte; guztiak aterpean, euriaren mehatxua saihesteko. Sestaoko Musika Eskola, herriko hainbat taberna eta San Pedro, Balmaseda Kondearen eta Kasko plazetan izango dira, hain zuzen ere, ikuskizunak.

Txotxongilo ikuskizunez gain, beste hainbat jarduera prestatu dituzte hiru egun horietarako; horien artean, aurpegiak margotzen ikasteko jarduerak eta txotxongiloak egiten ikasteko jarduerak.

Txotxongilo Egunean parte hartuko duten konpainia gehienak Euskal Herrikoak dira, Euskal Herriko Txotxongiloen Nazioarteko Elkarteko partaideak. Elkarte hori 1984an sortu zuten, Euskal Herriko txotxongilo elkarteak eta sektoreko beste hainbat profesional batzeko helburuarekin.

Enkarni Genua elkarteko zuzendariak adierazi duenez, krisi egoeraz jabetuta eta Txotxongilo Eguna berezia izan ohi denez, prezioak jaitsi egin dizkiote udalari.

Ikuskizunak doakoak izango dira, eta momentu atsegin eta dibertigarria pasatu nahi duen orori egin diote gonbita.