Euskaraldia, lanean jarraitzeko ariketa

Fagorrek berretsia du alor sozioekonomikotik euskararen normalizazioan eragiteko konpromisoa. Besteak beste, urteetako ibilbidean hainbat aitortza jasoak ditu (2021eko Abadia saria, kasurako); talde barnean abiaraziriko politikei eta egindako lanari esker, kooperatiba guztiek dute goi mailako Bikain euskararen kalitate ziurtagiria; bestalde, Fagor eragile da euskararen aldeko politiketan, eta, partaide erakunde publikoetako ordezkariek eta askotariko eragileek osaturiko guneetan (Gipuzkoa Berdinago, Indeus, Euskaragileak...). Baina Fagor Taldearen konpromisoa ez da bakarrik erakundeen esparrura mugatzen.

Horrela, datozen asteetan, Fagor Taldeko zortzi kooperatibek jardungo dute Euskaraldian murgildurik. Gainera, oinarrizko egitekoetatik —kideak Euskaraldiaren inguruan informatzea, prestatzea eta ariketa ikusgarri egitea— haragoko lanketa sakon bat egiteko konpromisoa hartu dute kooperatiba horiek guztiek, euskararen erabilera indartzeko helburuz. Ez da erronka makala, eta, kontuan hartuta Euskal Herriko kooperatiba talde industrialik handiena dela, Fagorrek ekarpen esanguratsua egin diezaioke Euskaraldiari.

Taldearen konpromisoa

Oro har, datozen egunetan, kooperatiba taldeko askotariko profilek jardungo dute ariketa sozialean murgilduta, eta lankideen artean erlazionatzeko hizkuntzan eragitea espero dute Fagorreko kideek. «Adibidez, ariketak aukera eskaintzen du euskara mailarekin konfiantzarik ez dutelako-edo lankideekin euskaraz aritzeko urratsa egin ez dutenek errazago eta erosoago egin dezaten urrats hori, eta euskaraz ondo dakitenek gutxiago dakitenekin euskaraz jarduteko urratsa egin dezaten, ariketak sortzen duen testuingurua baliatuz.

Euskaraldian egindako ariketak eragina izan dezake hortik aurrerako harremanetan», azaldu dute Fagorreko ordezkariek.
Fagorreko kideen %80k dakite euskaraz —5.245 langile ditu Euskal Herrian—, eta %50ekoa da ahozko erabilera orokorra —kooperatibako organo nagusienetan, berriz, %80tik gorakoa da ahozko erabilera—. Horretan zerikusia du urteetan erakunde gisa euskara planei eskaini zaien sostenguak, baita eman zaien garrantziak ere.

Euskara eta Euskaraldia, Fagorreko kideen ahotan