Mugikortasun adimendun eta jasangarriaren etorkizuna gidatzeko helburuarekin, MUBIL Centerrek bere instalazioak ofizialki inauguratu zituen joan den maiatzaren 12an, Donostiako Eskuzaitzeta industrialdean. Mugarri horrek Gipuzkoa eta Euskal Autonomia Erkidegoa (EAE) erreferente bihurtu ditu Europan, mugikortasun berriaren alorrean.
Inaugurazio ekitaldiaren buru Imanol Pradales Eusko Jaurlaritzako lehendakaria izan zen, eta harekin batera izan ziren Eider Mendoza Gipuzkoako diputatu nagusia, Unai Andueza Ekonomia Sustapeneko eta Proiektu Estrategikoetako diputatua eta Igor Villarreal MUBIL Fundazioko zuzendari nagusia. Topaketan Gipuzkoako eta EAEko ordezkaritza instituzional nabarmena bildu zen, baita mugikortasunaren sektoreko eragile nagusiak ere, enpresak, enpresa elkarteak, unibertsitateak eta erreferentziazko zentro teknologikoak barne.
MUBIL Center lurraldearen berrikuntza-ahalmenaren eta sendotasun industrialaren arteko konbinazio ezin hobea da. Azpiegitura estrategiko horri esker, lurraldeak, etorkizuneko mugikortasun erronkei aurre egiteaz gain, Europan mugikortasunaren garapena gidatu ahal izango du.
McLaren, IVECO, Peugeot, FIAT, Emotors eta beste marka nagusi batzuk lanean
25 milioi euroko inbertsioarekin eta 9.700 m²-ko azalera erabiliz eraikitako MUBIL Center azpiegitura teknologiko berria mugikortasun soluzio aurreratuen garapena, balioztatzea eta ziurtapena bultzatzeko diseinatu da. Bertan, Europan parekorik ez duten laborategiak jarri dira martxan, eta jada McLaren, IVECO, Peugeot, FIAT, Emotors eta sektoreko beste enpresa batzuk teknologia aurreratu horiek erabiltzen hasi dira, etorkizuneko mugikortasuna gaurtik eraikitzen.
Instalazioak hiru entsegu-laborategi ditu:
•Biltegiratze elektrikoko laborategia: segurtasun- eta fidagarritasun-estandar zorrotzenetan gelaxkak, moduluak eta bateria-sistemak probatzeko.
•Trakzio elektrikoko laborategia: automobilgintzaren eta garraio astunaren sektorerako motor-, inbertsore- eta transmisio-sistemak probatzeko.
•Hidrogeno-pilen laborategia: hidrogenotik abiatuta elektrizitatea sortzeko sistemak probatzeko eta balioztatzeko azpiegitura.
MUBIL Centerren 8 enpresa eta 2 kudeatzaile teknologiko arituko dira, guztira 80 profesional mugikortasun adimendun eta jasangarrirako irtenbide berritzaileak garatzen.
MUBIL benetako berrikuntza irekiko ekosistema gisa eratu da, eta lankidetzarako ingurune bat eskaintzen du start-up, ETE (enpresa txiki eta ertaina) eta enpresa handiek mugikortasun adimendun eta jasangarrirako irtenbideak garatu ditzaten. Instalazio berri hauetan Battera, Lazpiur, NX, Wattson, Battbelt, Veltium, AVL eta Novac aritzen dira, baita Cidetec eta EPower Labs kudeatzaile teknologikoak ere.
MUBIL Centerren inaugurazioak jarduera-egutegi trinko baten abiapuntua markatu du, berrikuntza sustatzeko, proiektu estrategikoak erakartzeko eta nazioarteko inbertsioa bultzatzeko helburuarekin.
Agenda honek helburu bikoitza du: batetik, azpiegitura teknologiko hau herritarrengana hurbiltzea, MUBILeko laborategiak eta haiek mugikortasun jasangarriaren etorkizunari egindako ekarpena bertatik bertara ezagutzeko aukera emanez; eta bestetik, berrikuntza bultzatzea, aukera berriak sortzea eta mugikortasunaren sektoreari lotutako nazioarteko proiektuak eta inbertsioak erakartzea.
Testuinguru horretan, maiatzaren 23an egin zen Mugikortasun Jasangarriaren Ikerketa Agendaren aurkezpena, Basque Research & Technology Alliance (BRTA) erakundearen eskutik. Hurrengo egunean, maiatzaren 24an, larunbata, jardunaldi berezia antolatu zen, non aldez aurretik izena eman zuten herritarrek MUBILen instalazioak bisitatzeko aukera izan zuten.
MUBIL Centerrek lurraldeko ekonomian eta industrian izango duen lidergoa partekatzeko asmoz, hilabete guztian zehar bertan izan dira Lanbide Heziketako, unibertsitateetako eta ingeniaritza eskoletako ikasleak, baita Gipuzkoako Foru Aldundiko langileak, Batzar Nagusietako eta Eusko Legebiltzarreko ordezkariak eta automobilgintzako industriari lotutako enpresak ere.
Agenda bizia du MUBILek, eta datorren maiatzaren 29an, MUBIL Lab Experience nazioarteko ekitaldia egingo da bertan, sektoreko enpresa garrantzitsuen garapenak eta estrategiak partekatzeko helburuarekin.
Ondoren, ekainaren 12an MIT erakundearekin elkarlanean garatutako MUBIL City Science Experience aurkeztuko da, Gipuzkoako mugikortasunari buruzko datuak biltzeko eta aztertzeko. Horren aurretik, ekainean, karga elektrikoari buruzko foro sektorial bat antolatuko da, trantsizio energetikoaren erronkak eztabaidatzeko eta lankidetza sustatzeko.
Uztailean, Mugikortasun Enpresen Aholku Batzordea eratuko da, zentroaren lehentasunak eta estrategiak zehazteko.
Azkenik, urteko azken hiruhilekoan, MUBILek jarduera berriak antolatzen jarraituko du, Gipuzkoa aukerak sortzen dituen lurralde eta mugikortasun jasangarriaren arloko nodo estrategiko gisa sendotzeko helburuarekin.
