Petronorrek 178 milioi euroko irabaziak izan zituen 2017an, urte bete lehenago baino %19,8 irabazi txikiagoekin. “Petrolio findugabearen prezioa aldakorra da, eta horrek eragina izan du irabazien zenbatekoan”. Emiliano Lopez Atxurra findegiko presidenteak horrela arrazoitu du irabazi txikiagoak edukitzea. Hala ere, irabazi txikiagoak izan arren, inoizko ekoizpen handiena izan du Petronorrek: 10.959 milioi tona. Eta hori findegia iaz bi hilabete eta erdiz itxita egon zela egokitze lanak egiteko. Ekoizpen horrek 5.432 milioi euroko negozio zifra eragin zuen. Datu horiek eskutan, Lopez Atxurrak urte on bezala definitu du 2017a, are gehiago geldialdiak eragindako gorabeherak kontuan hartzen badira.
Petronorrek izandako irabazi eta ekoizpen datu horien bueltan eman ditu presidenteak Bizkaiko Ogasunari ordaindutako zergen zenbatekoa: 745 milioi euro. Bilboko Portuko trafikoan ere zeresan handia du Petronorrek eragindako trafikoak, portu agintaritzaren %45,3.
