Aste Santuak prezioen garestitze handia ekarri zuen martxotik apirilera bitartean: %0,9 igo ziren salneurriak Hego Euskal Herrian, hein batean oporrei lotutako produktuek eta zerbitzuek —erregaia, aisia, arropak— izan zuten garestitzearen eraginez. Azken bi urteetako igoerarik handiena izan zen.
Orduko mailan mantendu dira prezioak maiatzean ere. Eta inflazioa ere ez da aldatu: %0,4koa zen apirilean, berdin maiatzean. Dena den, urteko lehen bost hilabeteetan izandako bilakaera aintzat hartuta, bizimodua %0,3 merkatu da joan den urteko datuekin alderatuta.
Iazko irailetik, %0,5eko mugaren azpitik dabil inflazioa Hego Euskal Herrian. Negatiboa ere izan zen martxoan. Herritar arruntentzat prezio apalak pozerako motibo diren arren, deflazio arriskuak erakundeen artean kezka eragiten du. EBZren helburua da %2aren bueltan ibiltzea inflazioa.
