Amaitu da Tecnalia osatzeko prozesua

ESI teknologia zentroko patronatuak gaur onetsi du Tecnalia Research & Innovationera (TRI) batzea, eta, horrenbestez, amaitu da zentro berri hori osatzeko prozesua. Funtsean, zortzi zentro teknologiko batzea esan nahi du Tecnaliaren sorrerak, eta, ondorioz, Europako teknologia zentro indartsuenetako bat eratzea. Labein, Cidemco,ESI, Euve, Fatronik, Inasmet, Leia eta Robotiker batuko dira TRIn; funtsean, Labeinek gainerako zazpiak bereganatuko ditu, eta, ondoren, izena aldatu eta Tecnalia Research & Innovation bihurtuko da.

Berez, uztailaren 16an zen egitekoa TRIren osatze ekitaldia, baina azken unean bertan behera geratu zen egoitzaren kokapenaren inguruan eztabaida sortu zelako Gipuzkoako eta Bizkaiko diputazioen artean. Gipuzkoak ezarri zuen baldintza zen egoitza probintzia horretan izatea. Labeinek horrek aurka egin zuen, eta Bizkaia eta Gipuzkoaren artean txandakatzea proposatu. Oraingoz, aukera hori nagusitu da, eta behin-behinean Bizkaian izango du egoitza erakunde berriak. Gipuzkoako Diputazioak ohartarazi zuen egoitza herrialde horretan jarri ezean ez zuela Tecnalian parte hartuko.