Juan Rosellen lekua hartuko du Garamendik (Getxo, Bizkaia, 1958), lau urterako. Hautagai bakarra zen, eta bozketarik gabe hautatu dute enpresaburu bizkaitarra. 43 erakunderen babesa zuen Garamendik.
Garamendi energia sektorean aritutakoa da, eta ibilbide luzea du enpresaburu elkarteetan. Orain arte, Cepyme Espainiako enpresa txiki eta ertainetako elkarteko burua izan da, baita CEOEn energia batzordeko burua ere.
Duela lau urte ere aurkeztu zen CEOEko presidentetzara, eta haren aldeko botoa eskatu zuen Confebask patronalak, "euskal enpresaburuen beharrei egokitzen zaizkion ezaugarriak" dituela argudiatuta. Rosellek hartu zion aurrea orduan. Gaurtik aurrera, ordea, Garamendi izango da Espainiako patronalaren bosgarren presidentea.
