Eskaria dela, gas natural garestiagoa dela, bateko eta besteko, gero eta garestiago ordaintzen da argindarra handizkako merkatuetan, eta oraingoz ez da joera aldaketa esanguratsurik espero. Espainiako eta Portugalgo argindar merkatua batzen dituen OMIEren arabera, bihar penintsulan hornitzeko argindarraren batez besteko salneurria inoizko handiena izango da, gaur 140 eurotik gora salerosi delako megawatt-ordua. Zenbatekoa are ikusgarriagoa da urte beteko atzera begiratua eginda: iazko iraileko lehen ostegunean megawatt-orduaren handizkako prezioa 46 eurokoa izan zen.
Azken egun hauetan Europako beste herrialdeetan ere garesti ari da salerosten megawatt-ordua: Erresuma Batuan 170 euroko preziora iritsi da (147,65 libera esterlina); Alemanian, 118 euroak gainditu ditu; Italian, berriz, 139 euroren inguruan dabil megawatt-ordua; eta Frantzian, 107 eurotik gora.
