Irailaren 17an aurkeztu zuen Arkema Quimicak Alonsotegiko lantegia ixteko erregulazio espedientea. Itxiz gero, 59 langile geratuko lirateke kalean, eta zeharka beste hogeiri eragingo lieke. Erabakiaren aurka 35 egun daramatzate greban beharginek, eta bideragarritasun plan bat ere aurkeztu dute, enpresak irabaziak izan ditzakeela erakutsiz. ELAren esanetan, faktore horiek bultzatu dute "sona handiko bufetek" aholkatzen duten enpresa espedientea kentzera.
Enpresaren erabakia "irabazitako bataila" da sindikatuarentzat, nahiz eta iragarria duen beste espediente bat aurkezteko asmoa. "Horrek erakusten du nolako fede txarra izan duen negoziazio prozesu osoan". Hala, mobilizazioekin jarraitzeko asmoa dute langileek. Bihar, Cebeken egoitzaren aurrean elkarretaratzea egingo dute.
Jaurlaritzaren jarrera ere salatu du ELAk. "Industria Sailak astebete darama bilera eskaerari erantzun gabe".
