Atzeraldiaren erritmoa bizkortzen ari da Grezian: %6,8 joan den urtean

Defizita murrizteko neurri gogorrak Greziaren atzeraldia sakontzen ari dira. Atzo jakin zenez, iaz %6,8 egin zuen behera Greziako BPG barne produktu gordinak. Lau urte daramatza atzeraldian Greziak, eta hondoratzea, moteldu beharrean, bizkortu egin da: urteko hirugarren hiruhilekoan %5 uzkurtu zen eta %7 azkenekoan. Troikak %5,5eko atzeraldia espero zuen.

Baina BPGaren jaitsiera Greziaren pobretzearen datu bat baizik ez da. Azken urte eta erdian langabezia bikoiztu egin da, eta %21etik gora dagoelako esango dute hurrengo datuek. Soldatak %20 eta %30 artean jaitsi dira krisia hasi zenetik, eta prezioak %10 igo, kontsumoaren gaineko zerga guztiak igo egin direlako. Erosteko ahalmenaren beherakadak 60.000 enpresa eta denda ixtea ekarri du. Inbertsio publikoa %40 jaitsi zen iaz.

Eta egoerak okerrera egingo du aurten, Greziako Parlamentua gastua gehiago murriztea onartu baitzuen igandeko bozketa kalapitatsuan, egoitzaren kanpoaldean dozenaka eraikin sutan zeudela. Orduan onartutakoak indarrean nola jarri erabakitzeko eta falta diren 325 milioi euroren mozketak non egingo dituen finkatzeko bilera izan zuen atzo Atenasko gobernuak, LAOS eskuin muturreko alderdia jada kanpoan dagoela. Xehetasun horiek falta direla, euroguneko Finantza ministroek gaurko deituta zeukaten bilera astelehenera atzeratzea erabaki zuten. Orduan erabaki behar dute Greziari bigarren erreskatea ematen dioten.