Apurka-apurka Bankia pribatizatzen ari da Espainiako Estatua, FROB bankuak erreskatatzeko funtsaren bitartez. 2014an akzioen %7,5 saldu zituen, eta 1.304 milioi euro patrikaratu zituen. Antzeko kopurua saldu du gaur goizean (%7), baina haren truke askoz diru gutxiago jaso du (818,3 milioi). Inbertsiogile kualifikatuei saldu die.
Akzio bakoitzaren truke 4,06 euro jaso ditu FROBek, Bankiaren akzioak astelehen gauean balio zuena baino %2,71 gutxiago. 2014. urtean, berriz, 6,04 euro lortu zituen akzio bakoitzeko. Urte horretan beheranzko bide bat hartu zuen bankuaren kotizazioak, eta 2016ko ekainean jo zuen behea, 2,20 eurotan salerosi zenean. Orduz gero, gorabeherekin, balioaren zati bat berreskuratu du.
Espainiako Estatuak 22.424 milioi euro jarri zituen Bankia porrotetik salbatzeko, gehiena Europako Batasunak emandako erreskatetik. Dirutza horren %11 baizik ez du berreskuratu, 2.656 milioi euro, kapitalaren %14,5 salduta eta 2014az geroztik Bankiak izandako irabazietatik dagokion zatiarekin.
FROBek 2019ko abenduaren 31era arteko epea du Bankia guztiz pribatizatzeko. Epe hori finkatu zuen Europako erreskaterako dirua jasotzeko sinatutako memorandum-ak.
