Bankuen emaitza oneko boladak ez du etenik. Interes tasa handien eraginpean, olatuen aparrean ari dira guztiak, eta BBVA ez da salbuespena. Aurtengo lehen hiruhilekoan, 2.200 milioi euro irabazi ditu, iaz tarte berean baino %19,1 gehiago. Eta hori, bankuen irabazien gaineko zerga berezia kontuan hartuta. Izan ere, bankuaren datuen arabera, 285 milioi euro ordaindu ditu zergetan, iaz baino %26,5 gehiago.
BBVAk 8.218 milioi euroren diru sarrerak izan ditu hiru hilabeteotan, iazkoak baino %18,1 handiagoak. Eta nola banatu dira diru sarrera horiek? Bada, 6.512 milioi maileguen itzulketatik eta haiei eragiten dieten interesetatik lortu ditu, iaz baino %15,4 gehiago. Beste 1.887 milioi euroak, berriz, komisioetatik lortu ditu. Horiek %31,1 handitu dira.
Urte hasiera ona izan da bankuen akziodunentzat, eta, Onur Genç bankuko kontseilari delegatuaren iritziz, hori izango da urte osoaren joera. Emaitzak «ezin hobetzat» jo ditu, eta iragarri urteko mozkin aurreikuspenak are hobeak direla. Egoitza nagusia Bilboko Kale Nagusian duen bankuaren aktibo guztien balioa 801.690 milioi euro da. Urte bakarrean %8,4 handitu da jabetza horien balioa.