Bilboko Gizarte Arloko Epaitegi batek ateratako epaiaren arabera, Asier Irazabal Tamayo langilea bere enpresak lan istripuak saihesteko prebentzio planeko neurriak hartu ez zituelako hil zen, 2008an. Bilbon zendu zen, Supersur errepidea eraikitzeko beharrean ari zela. LABek auzitara jo zuen, eta epaileak arrazoia eman dio.
Enpresako arduradunek Irazabal tunel baten barrura bidali zuten matxura bat konpontzera, eta barruan zela sabaiaren zati bat erori eta azpian harrapatuta hil zen. Epaiak dio lanetako makinek geratuta egon behar zutela Irazabal lan hartan ari zela, eta ez zeudela.
Bizkaiko Foru Aldundiak sustatutako lanak ziren, Interbiak enpresaren bidez, eta LABek heriotza haren erantzule egin du aldundia.
