Hendaiatik Baionara korrika etorri dira hainbat lagun, erretreten erreformaren kontrako mugimenduan «segitzeko prest» direla adierazteko. Eguerdian abiatu, eta 42 kilometro egin dituzte Baionara iristeko: batzuek kilometro zenbait egin dituzte, beste zenbaitek, ibilbide osoa egin dute korrika. Amaiur Koskarat trenbideetako langileak maratoian parte hartu du. «Adierazi nahi izan dugu maratoi bat bezala, gure borroka luzea izanen dela, baina guk iraungo dugula... Eta iraun dugu», esan du. Azaldu du eragile eta sindikatu askok protestan parte hartu dutela, grebalarien erresistentzia kutxa «ekonomikoki laguntzeko». Koskaratek uste du «mugimenduak sostengu zabala» duela oraino. Korrikalariak geltokira iritsi direnean, manifestazio intersindikalak hartu du erreleboa. Ehunka lagun batu dira «erretreta gurea da» lelopean.
Urtarrilaren 24ean aurkeztu zuen Edouard Philippe Frantziako lehen ministroak puntukako pentsio sistema ezartzeko lege proiektua ministroen kontseiluaren aitzinean. Egun berean, kritika zorrotza egin zion erreforma proiektuari Frantziako Estatu Kontseiluak, haren «segurtasun juridikoa» bermatzea ezinezkoa zaiola ebatzita; besteak beste, proiektuaren finantzaketako «hutsuneak», justifikatu gabeko tratu desberdintzea eta konstituzioaren kontra doazen promesak azpimarratu zituen argitaratutako oharrean. Asteartean, Frantziako Asanbleara iritsi zen Frantziako Gobernuak ezarri nahi duen puntukako pentsioen erreforma. Lege proiektua aztertzen hasi dira 70 bat diputatu, horretarako sortu duten batzorde berezian.
