BURTSA. Dirobi eta dirurri

Aturri eta Errobi ibaiak urez gainezka ziren bergisan, burtsa dirobi (diru hobi) bihurtu da eta dirurri (diruz urri) laga ditu inbertsiogilerik gehienak. 8.200 punturen langa jo du Ibex-35 indizeak eta Baiona Ttipia uretan nola, hala ito dira galeretan Bilbao-2000 eta biak. Txokolatea lehor mantendu zuenik izan zen arren (Criteria, Fenosa, Bankinter eta BMEk %1 baino irabazi txikiagoak izan zituzten), igerian doi doi eutsi zion Iberiaz landa (=), gainontzeko guztiek galeren bustia somatu zuten.Bai katedralarena egiten duen Edurnezurik (-%1,73), bai bi banku handiek (-%2na pasa), salmenta ibaien ekarria pairatu zuten. Espainian BPGren atzeraldia baieztatzearekin bat (%1 pasakoa iazko azken hiruhilekoan), etxe eta ostatu apalenek ere kalte artean pairatu zuten atzoko 1.754 milioiren joan etorria: %4 pasa galdu zuen Sacyrrek, %3na pasa Abengoa, Inditex, Gamesa eta Repsol-YPF blue chip-ak eta %1 Iberdrola eta seme kuttun Renovablesek ere.



Gas Natural. Foiletoi onek bezala, Gas Naturalek (-%1,35) egindako Fenosaren (+%0,63) gaineko Erosteko Eskaintza Publikoak (EEP) aurrera jarraitzen du. Lehia Batzordeak 2.000 megawatt ekoizteko ahalmena besterenganatzeko baldintza jarri dio (Energia batzordeak eskatzen zizkion 800 MW baino askoz gehiago), bezeroen %3rekin batera. Ziklo konbinatuko zentralak saltzea legokioke. Enagasen (-%0,15) duen %5eko partaidetza ere saldu egin beharko du Kataluniako enpresak baina, Criteriaren (+%0,81) irribarrea ikusita, baldintza onargarriak direla pentsa liteke.