BURTSA. Geure burua sentitu ezinda

Bada gorputza ez, burua soilik sentitzen dugula dionik. Ez dakit, baina AEBetako BPG geurea baino ere gehiago axola zaigu. Auzoa, geure burua baino gehiago sentitzen dugula dirudi. Munduko ekonomiaren motorra %3,4ko erritmoan hazi da urteko bigarren hiruhilekoan, baina %3,6 haztea espero zuten ezkorrenek, lehen hiruhileko %3,8ko hazkundea ikusita. Dena den, tarte estuan mugitu zen Ibex-35 egun osoan eta, azken orduetako galerak hagitz txikiak izan ziren, eta 10.100 puntuen maila ia uneoro gorde zuen. %4 eta %3 pasa irabazi zuten hurrenez hurren Iberia eta Sogecablek, baina BBVA (-%0,57) eta galerek pisu handiagoa izan zuten. 2.007 milioiren akzioak salerosi ziren ohiko merkatuan eta %3,4 igoz amaitu du hilabetea Ibex-35 indizeak. Urtebeterako Euriborrak igoera txikia izateak abisua eman du: ez dago betirako igoera edota jaitsierarik.

-Erregaia garestitzeak aurtengo lehen seihilekoan iazkoan baino %53 gutxiago irabaztea ekarri dio Iberia (+%4,1) hegaldi konpainiari, 29 milioi euro. Amadeusen zuen partaidetza Erosteko Eskaintza Publiko (EEP) bati erantzunez saldu ondorengo gainbalioa ez dago emaitza horretan jasota, salmenta uztailan egin zelako. Baina simulatzaileak eta Iber-Swiss saltzearen 23 milioiko mozkina, bai. Pentsa, hori gabe, non legoken.