BURTSA. Guztiak auzitara!

Bada EAJ eta EAko zuzendaritzak auzitara eraman nahi dituenik, baina auzitara-auzitara Emilio Botin SCHko presidentea joango da oraingoz, urtarrilaren 10etik aurrera. Botinek, bere bidetik kentzeko, Jose Maria Amusategi presidente ohiari 43 milioi euroko kalte-ordaina eta Angel Korkostegi kontseilari ordezkari ohiari 108 milioi eurokoa eman eta akziodunei kalte egin zietela dio akusazioak. SCHren kotizazioan ez zuen eraginik izan albisteak, berdin-berdin gelditu baitzen. Bankinterrek, aldiz, %0,6 galdu zuen, Botin bankuko akziodun nagusi bihurtu dela jakin ostean.

Ez LPEEren ekoizpen murrizketari eta ez Wall Streeten beheranzko zabalerari ez zioten jaramon handirik egin merkatuek, eta Ibex-35ak atzera urteko maila handiena iritsi zuen. Enagas igo zen gehien (+%3,19), eta Telefonica ere ondo ibili zen (+%1,39).

-ZEltia izango da, analisten ustez, Ibex-35ean Telecincori bere lekua utzi beharko dion balioa datorren astelehenetik aurrera, eta farmazia alorreko konpainiaren akzioak izan ziren indizean gehien jaitsi zirenak, %1,3. Ekainean burtsara atera zenetik, Telecinco merkatuko likidezia handienetakoa duen konpainia bihurtu da Telecinco. Galiziako enpresaren kontratazio bolumena eta kapitalizazioa, aldiz, nabarmen jaitsi dira azkenaldian.