Caja Madridek bost aliatu aurkitu ditu, eta Gironakoa erosi du La Caixak

FROB funtsetik dirua lortzeko epea amaitzen ari denean, bizkortu egin dira aurrezki kutxen bat-egite eta erosketa prozesuak. La Caixak onartu egin zuen atzo Caixa Girona bere egiteko negoziazioetan ari dela. Beste kutxa erraldoi batek, Caja Madridek, Caja Avila, Laietana, Segovia, Rioja eta Insular de Canarias kutxekin fusio hotza eginda txukundu nahi du bere balantzea.

Teorian, ekainaren 30ean bukatzen da banku eta aurrezki kutxen fusioak errazteko Espainiako Gobernuak indarrean jarritako FROB funtsa. Epe horretatik aurrerako operazioek ez dute Espainiako Bankuaren laguntzarik izango beren kapitala osatzeko. Edonola ere, epea luzatzeko aukera badagoela onartu zuen atzo Elena Salgado Espainiako Ekonomia ministroak.

La Caixaren eta Caixa Gironaren arteko bat-egitea, berez, irenste bat da. La Caixak 272.404 milioi euroren aktiboak zituen martxoan, Caixa Gironak baino 35 aldiz gehiago. Caixa Gironak negoziazioak izan ditu Katalunian martxan diren beste bi fusio prozesuetan parte hartzeko, baina azken unean atzera egin du. Caixa Catalunyarekin batu dira Caixa Manresa eta Caixa Tarragona, eta Unnim taldea osatzen dute Manlleu, Terrassa eta Sabadell kutxek.

Caja Madriden aliatuak

Neurri aldetik aldea handia dago Caja Madriden eta bere aliatuen artean ere. Madrilgo kutxak 190.000 milioi euroren aktiboak ditu, eta harekin batuko direnek 37.000 milioi. Negoziazioek aurrera egiten badute, SIP bat osatuko dute seiek, hau da, fusio hotza edo birtuala dena. Pentsatzekoa denez, balantzeak elkartuko dituzte eta bakoitzak bere lurraldeko egiturari eta gizarte ekintzari eutsiko dio. Caja Segoviako eta Caja Avilako administrazio kontseiluek Banca Civica taldean sartzearen aurkako botoa eman zuten ostegunean. Nafarroako Kutxa da talde horren bultzatzailea.

Ofizialki baieztatzea falta den arren, fusio hotza egitekotan dira beste lau kutxa: Caixa Penedes,Caja Murcia, Granada eta Sa Nostra.