CCOOk eta UGTk Maiatzaren Lehenean elkarrekin egingo dituzten manifestazioetan parte hartzera deitu dute. Asteazken eguerdian mobilizatuko dira, Hego Euskal Herriko lau hiriburuetan, Enpleguaren alde. Menos jornada y más salarios lelopean. Lanaldia murriztea eta soldata hobeak galdegingo dituzte. Uste dute hori eskatzeko garai egokia dela, «enpresak irabazi izugarriak izaten ari baitira».
Pedro Sanchez buru duen Espainiako Gobernuak azken urteetan «lortutakoak» nabarmendu dituzte bi sindikatuek: besteak beste, kontratuen behin-behinekotasuna murriztea eta lanbide arteko gutxieneko soldata igotzea. Hala ere, ohartarazi dute oraindik «gauza asko» egiteko daudela. Eta horien artean honako hauek aipatu dituzte: kaleratzeagatiko kalte ordainak handitzea eta lanaldi partzialeko kontratazioak gutxitzea. Baina, bereziki, beste bat nabarmendu dute: lanaldien murrizketa. Enpresen mozkinetan ere esku hartze handiagoa galdegin dute, eta adierazi dute zerga erreforma bat premiazkoa dela horretarako.
Pasa den igandeko bozen ostean sortuko den Eusko Jaurlaritzari ere egin dizkiote eskaerak. Besteak beste, zaintzaileen lan baldintzak hobetzeko itun bat proposatu diote, eta patronalei eska diezaiela soldatak hobetzeko, langileak erakartzeko eta atxikitzeko estrategia gisa. Etxebizitza publiko eta alokairu sozialeko etxebizitza gehiago ere eskatu dizkiote.
