EAJk eta PSE-EEk sinatu berri duten itun fiskalera PP batzeko bidea zabal-zabalik utzi dute akordioaren bi subjektu nagusiek; izan ere, ez dute gehiengorik erakunde guztietan zergen inguruan egindako akordioa gauza dadin. Gipuzkoako Diputatu Nagusi Martin Garitanoren ustez, "ez litzateke oso arrazoizkoa" hiru alderdiek bat egitea atal fiskalean, "baina politikan denetarik ikusten da", esan du Radio Euskadin.
Araba, Bizkai eta Gipuzkoan gauzatuko litzatekeen akordioa egin dezakete hiru alderdiek, "mota bateko edo besteko erreforma fiskala inposatzeko", baina "muturreko eskuin espainiarrak, eskuin abertzaleak eta sozialdemokrazia espainiarrak nola nahasten diren azaldu beharko lukete", Garitanoren iritziz.
PSE-EErentzat mezu argia bidali zuen: sozialistek azaldu behar dute "zergatik egin duten atzera" alor fiskalean EH Bildurekin Gipuzkoan hitzartu zuten neurriekiko, Eusko Jaurlaritzarekin akordioa egiteko orain.
EAJren inguruan ere hitz argiak izan ditu diputatu nagusiak. "Ardanzaren garaietarako inboluzioa" aipatu du eraikuntza nazionala aztertzerakoan.
Bestalde, aste honetan Antzuolan, GI-632eko lanetan egondako lan istripuan hildako kamioilariaren auziari ere heldu dio. ELAri galdetu dio zergatik ez zion diputazioari ohartarazi istripua izandako kamioian "irregulartasunak" atzeman zituela.
