Ehunka pertsona atera dira gaur goizean kalera Ezkerraldean eskualdearen defentsan. Hainbat langabe, bizilagun eta pentsiodun elkartek, gizarte kolektibok, talde feministek eta sindikatuk deituta, Sestao, Portugalete eta Santurtziko kaleak zeharkatu dituzte, prekarietatea eta pobrezia handitu direla salatuz.
Ezkerraldean 20.000 pertsonatik gora langabezian daudela salatu dute, eta 8.000 langileri aldi baterako lan espedienteak ezarri dizkietela. Horregatik, koronabirusaren testuinguruan, lehenbailehen langabezia tasa altuari, prekarietateari eta pobreziari aurre egiteko «neurri zehatzak» eskatu dituzte.
Gainera, salatu dute gerrak, gastu militarrak eta armen erosketa finantzatzea baliabide publikoak xahutzea dela.
