Beste bi diru alternatibo sortuko dira hurrengo asteotan. Urtarrilean izango da erabilgai Ekhi izenekoa, Bilboko Alde Zaharrean lehenik, baina Bizkai osorako dirua izateko asmoarekin. Aurretik, abenduan bertan, Ogerlekoak ikusiko dira Aiaraldeko hiru herri nagusietan (Laudio, Amurrio eta Artziniega). Iazko urtarrilaren amaieratik zirkulazioan dago Eusko dirua Lapurdin, Nafarroa Beherean eta Zuberoan.
Bi urteko lanaren fruitua izango da Ekhi. Haren bultzatzaile Ekhi Txanpona taldea diru ekarpenen bila ari da orain, urtarrilean dirua jaulki ahal izateko. 7.500 euro bildu nahi ditu, eta 2.900 bildu ditu honez gero, behar duenaren %38. Diru horrekin ordaindu nahi dute billeteen inprimaketa eta irteerako beste gastuak.
Billeteen diseinua jada prest dute elkartekoek. 1,2, 5, 10 eta 20 eurokoak izango dira, eta Bizkaiko eraikin esanguratsuak agertuko dira, Balmasedako zubia, Gaztelugatxe, Gorbeiako gurutzea edo Bilboko San Anton eliza.
