Xavier Bertrand Frantziako Lan ministroak iragarri duenez, Frantziako Gobernuak erretreta osorik jaso ahal izateko kotizatu beharreko urte kopurua handitu nahi du. Orain arte 40 urte kotizatu behar ziren erretiroa osorik jasotzeko. Bertrandek esan du, ordea, 41 urte eta sei hilebetera igoko dutela.
Dekretu bidez onartu nahi dute aldaketa. Bertranden iritziz "logikoa" eta "beharrezkoa" da neurria erretreten sistemari eutsi ahal izateko, eta 1955. urtetik aurrera jaiotakoei eragingo lieke.
Egun batzuk barru indarrean sartuko da erretreta hartzeko adina atzeratzeko erabakia. Udazkenean hainbat greba eta protesta eragin zituen horrek. Ministroaren hitzetan Gobernua legea betearazten ari da, eta bizi itxaropenaren handitzeak eragina izan behar du horretan.
