Enegarren isuna jarri diete enpresa teknologiko handiei Europan. CNMC Espainiako Merkatuen eta Lehiakortasunaren Batzordeak 194 milioi euroko isuna ordaintzera zigortu ditu Amazon eta Apple AEB Ameriketako Estatu Batuetako enpresei. Batzordearen arabera, hainbat akordio sinatu zituzten enpresa biek 2018an, Amazonen merkatu digitalean Applek eta harekin lotura duten saltzaileek posizio pribilegiatua izateko eta hirugarren saltzaileak ezkutatzeko.
Zehazki bi kontratu sinatu zituzten enpresek, Amazon Appleren banatzaile baimendua izateko. Hala, batzordearen ustez, Apple eta harekin harremana duten saltzaileek soilik saldu zitzaketen enpresaren produktuak Amazonen Espainian, eta ondorioztatu du Amazon erabiltzen duten saltzaileen %90 online merkatu nagusitik kanpo geratu zirela. Antza, kontratu horien aurretik saltzaile txiki horiek ziren Amazonen Appleren produktu gehienak saltzen zituztenak.
Hala, batzordearen arabera saltzaileen arteko lehia apaldu egin zen, eta, prezioak igotzeaz gain, salmenta guztiak Appleren eskuetan geratu ziren. Beste marka gehienek, baina, ez zuten halako kontraturik, eta, saltzaile txikien arteko lehiak hor jarraitzen zuenez, ez ziren horrenbeste igo prezioak.
Appleri 143,6 milioi euroko isuna jarri diote, eta Amazoni, berriz, 50,5 milioi eurokoa. Amazonek adierazi du ez dagoela ados CNMCaren epaiarekin.
XXI. mendean munduko enpresa baliotsuenak bihurtzen ari diren enpresa teknologikoak etengabe ari dira topo egiten Europako epaitegiekin, eta milioika euroren isunak ordaintzera zigortzen dituzte tarteka. Suediako Spotify musika plataforma izan zen azkena, eta Metari, Mark Zuckerbergen enpresari, inoizko isunik handiena jarri zioten maiatzean EBn: 1.200 milioi euro. Urtarrilean ere 390 milioi euro ordaintzera zigortu zuten.
Normalean, bi kontugatik jartzen dizkiete halako enpresei isunak: gehienek datuen pribatutasunarekin zerikusia dute, epaitegiek behin baino gehiagotan ebatzi baitute datuak babesteko neurriak urratzen dituztela enpresa horiek. Bestalde, lehiakortasuna arautzen duten legeak haustea ere egotzi diete behin baino gehiagotan.
