Europako Batzordera bidali behar duen Egonkortasun Programaren nondik norakoak aurkeztu zituen atzo Pedro Solbes Espainiako Ekonomia ministroak. Funtsean, programak dio Espainiak ezingo duela Europako Egonkortasun Ituna bete, 2008-2011 epean defizit publikoaren %3ko muga hautsiko duelako.
Azken urteotan superabita lortu ostean -BPGaren %2,2koa zen 2007an-, Solbesek aitortu zuen aurten defizit publikoa %5,8ra igoko dela. 2008.urtea %3,4ko defizitarekin bukatu zuenez eta 2010 (%4,8) eta 2011 (%3,9) ere mugatik gora bukatuko duenez, Bruselak zigor espedientea ireki beharko dio Espainiari. Madrilek «ekonomiaren bat-bateko geldialdia» argudiatuko du defizita justifikatzeko.
Espainiako Estatuaren zorra ere handituko da. Iaz BPGaren %40etik behera zegoen eta %54ra iritsiko da 2011n.
Okerrena aurten
Langabeziaren okerrena 2009an ikusiko dela iragarri du Solbesek: 2008an, tasa %11,1ra iritsiko da eta %15,9ra aurten. Ondoren hasiko da pixkanaka jaisten: %15,7ra 2010ean eta %14,9ra2011n. Solbesek ziurtatu du aurten 600.000 lanpostu desagertuko direla, eta «inondik inora» ez dela iritsiko lau milioi langabeen kopurura. Edonola ere, langabeziaren hazkundeak behartuta, aurten beste 2.000 milioi euro beharko ditu Estatuak langabeen sariak pagatzeko.
Ekonomia ministroaren arabera, aurten iritsiko dira «krisiaren unerik larrienak». Hala ere, espero du urtearen amaieran hazkundearen lehen zantzuak itzuliko direla eta datorren urtean tasa positiboa iritsiko dela. «Hazkunde bizia», berriz, ez luke 2011era arteheldu behar.
Espainiako aurreikuspenak (%)
2007 2008 2009 2010 2011BPGaren hazkundea 3,4 1,2 -1,6 1,2 2,6
Langabezia tasa 8,3 11,1 15,6 15,7 14,8
Aurrekontuen balantzea 2,2 -3,4 -5,8 -4,8 -3,9
Zor publikoa 36,2 39,5 47,3 51,6 53,7
