Hauteskunde kutsuko erabakia iruditu zaie Espainiako kontsumitzaileen elkarte askori gaur Espainiako Gobernuak iragarri duen neurri berria. Argindarraren faktura %2,2 murriztuko dutela adierazi baitu Soraya Saenz de Santamaria eledunak, Ministro Kontseiluaren osteko agerraldian. Gobernuaren kontrolpean dagoen argindar kostuaren gainean ezarriko du murrizketa.
Kontsumitzaileen elkarteek ohartarazi dute murrizketa ia ez dela atzemango. Izan ere, urtez urte argindarra igotzen joan direla oroitarazi dute, eta jaitsiera oso txikia dela.
Hilaren lehenetik hasita, ordu bakoitzeko tarifaren arabera pagatzen da argindarra. Hala ere, litekeena da kontsumitzaileek urrira arte aldaketarik ez igartzea, argindar konpainiek hiru hilabeteko epea baitute egokitzeko. Oraindik ikusteko dago aldaketak zein ondorio praktiko izango dituen.
