Bi urte baino gehiagoko atzerapenarekin jasoko dute 2012ko Gabonetako aparteko saria Espainiako administrazio zentraleko langile publikoek. Cristobal Montoro Espainiako Ogasun ministroak gaur goizean iragarri du urtarrilean hasiko direla diru hori itzultzen, "ekonomiaren egoera hobea delako". Ez du, ordea, zor dien diru guztia itzuliko, aparteko sari horren laurdena besterik ez. Madrilek erabaki zuen 2012ko Gabonetako saria kentzea bere langileei ez ezik, baita beste administrazio publikoetakoei ere. Horietako batzuek, tartean Eusko Jaurlaritza, inposizio horren aurkako helegitea jarri zuten.
Espainiako Auzitegi Konstituzionalak erabaki bitartean, Eusko Jaurlaritzak eta beste euskal administrazio gehienek erabaki zuten beren langileei aparteko sariak aurreratzea. Horrela, 2012ko abenduan 2013ko uztaileko saria jaso zuten, 2013ko uztailean 2013ko abendukoa, eta horrela gaur arte. Orain, dinamika hori hautsi beharko dute. Jaurlaritzak 50 milioi euro jarri ditu 2015eko aurrekontuetan sari hori ordaintzeko, baina oraindik ez du esan zehazki noiz erabiliko duten.
Hauteskunde urtea da 2015a: udal eta autonomia erkidego gehienetako bozak daude maiatzean, eta Espainiako Gorteetakoak udazkenean. Bost urte daramatzate langile publikoek soldata igoerarik gabe. Berez, Mariano Rajoyk bere agintaldia amaituko du funtzionarioei beren saria inoiz igo gabe.
