Aurreko ostiralean, Adegi patronalak lan harremanetarako hirugarren bidea esan dion proposamena aurkeztu zuen, negoziazio kolektiboan sindikatuak bazter utzi eta zuzenean enpresarien eta langileen arteko akordioak lortzeko xedearekin. "Oso kezkagarria, aldebakarrekoa eta botere harremanetik planteatua" dela uste du Ainhoa Etxaide LABeko buruak. "Lan gatazkaren iturri izango litzateke", esan du Radio Euskadin.
Gainera, lan erreforma "oztopo" gisa ikusten du Etxaidek, egoerak "irtenbide oso bat" behar duelako eta "trantsizio adostu batera iritseko" ez duelako mesederik egiten, kalte baizik. "Patronalaren posizioa finkatzen du". LABeko idazkari nagusiak esan du egoera ez dela soilik "lan gatazka" baten baitan ulertu behar, "arazo politikoa" delako. Hala, alderdi politikoei gonbidapena egin zien LABek erreformak lan harremanak gehiago hautsi aurretik, "eztabaida politikoa" susta dadin. EH BIlduk eta PSE-EEk baiezkoa eman diote eztabaida horri, eta EAJk eta PPk ez dute erantzun, Etxaideren arabera.
