Eurostaten lehen estimazioen arabera, euroaren eremua osatzen duten hemeretzi estatuek hazkunde erritmoari eutsi diote urtearen amaieran. Urteko hirugarren hiruhilekoan %0,3 hazi ziren —aurrekoarekin alderatuz gero—, eta tasa horretan laugarrenean ere. Horri esker urteko azken hiruhilekoan barne produktu gordina %1,5 handiagoa zen urtebete lehenago baino.
Europako Batasun osoa ere %0,3 hazi zen hiruhilabete arteko tasan, eta %1,8 urte artekoan.
Irlanda da EB osoan bizkorren hazten ari den herrialdea. Azken hiruhileko datua falta da, baina aurrekoan %6,8ko erritmoan ari zen hazten. Haren atzetik datoz Luxenburgo (%5,4). Txekiar Errepublika (%4,5) eta Eslovakia. Ekonomia handienen artean Espainiak eman ditu emaitzarik onenak, %3,5eko hazkundearekin, eta oso urruti ditu Erresuma Batua (%1,9), Alemania eta Frantzia (%1,3), eta Italia (%1).
Bi herrialde baizik ez daude atzeraldian: Grezia (-%1,9 urte arteko tasan) eta Finlandia (-%0,2).
Euskal Herrian ere hazkundea %3ren bueltan dabil. Araba, Bizkai eta Gipuzkoa %2,8 hazi ziren iaz, eta Nafarroa, berriz, %3,1.
Gorabidean dauden herrialde batzuren krisiak eta merkatu urduriek arrisku handiak sor ditzaketela onartuta ere, aurten eta datorren urtean EBko ekonomia are bizkorrago haziko dela iragarri zuen joan den astean Europako Batzordeak: %1,7 eta %1,9 hurrenez hurren eurogunea, eta %1,9 eta %2 Europako Batasuna.
