Lurzoru degradatua oneratu eta jarduera ekonomiko berriei tokia egiteko asmoz, Eusko Jaurlaritzak, Sprilurren bitartez, hamabost hektareako lursaila erosi dio Zumarragan Arcelor Mittali. Lur horietan daude, besteak beste, 2016. urtean itxitako fabrika eta gaur egun jardunean ari den txatarra biltegia, zeina enpresak beste toki batean kokatuko duen.
Zazpi milioi euroko prezioa adostu dute aldeek. Horretarako tasazio balioari kendu egin zaizkio lurzoruaren deskontaminaziorako kostua eta fabrika azpitik doan ibaiaren zati bat aire zabalera ateratzeko kostua; izan ere, erosleak, hots, Jaurlaritzak, hartuko ditu bere gain lan horiek. Salerosketa akordio formala irail honetan aurreikusten da, eta urrian hasiko lirateke instalazioak desegiten.
