Funtzionarioen aldi baterako ordezkapenak egiteko lan poltsak eratuko dituela iragarri du Eusko Jaurlaritzak gaur. Zazpi arlotarako aukeratuko ditu langileak: zuzenbidean, ekonomian, arkitekturan, epidemiologian, adingabeen zentroetan, berdintasun arloan eta administrazioko goi mailako kidegoan aritzeko, hain zuzen.
Besteak beste, lanerako ezintasuna duten funtzionarioen edota lana eta familia uztartzeko baimenak dituztenen ordezkapenak egingo dituzte. Bitarteko funtzionarioaren maila izango dute. Arkitekto eta berdintasun teknikariek ez beste guztiek euskararen hirugarren hizkuntza eskakizuna bete beharko dute.
Urtea amaitzerako egingo du deialdia. Jaurlaritzaren arabera, ordezkapenak "modu arin eta eraginkorragoan" egitea da helburua, "publizitate, berdintasun, merezimendu eta gaitasun printzipioak errespetatuta".
