Helena Franco Gipuzkoako Ogasun diputatuak gaur goizean jakinarazi du Gipuzkoako Foru Aldundiak "arrisku bereziko zergadunen errolda" osatzeko asmoa duela, eta horretarako hainbat mekanismo martxan jarriko dituela iragarri du.
Zehazki ez du argitu zeintzuk sartuko diren zerrenda horretan, baina ohartarazi du enpresa handiei jarraipen berezia egingo dietela. Herritarrek euren betebeharrak "borondatez" betetzea lortu nahi dute, eta "kontzientziaz" joka dezatela. Zerga iruzurraren aurrean "ezikusiarena" ez dutela egingo esan du Francok.
Errolda hori barne dokumentu gisa erabiliko dute, eta foru arau baten bitartez tramitatuko dute datozen egunetan.
