Euskal industriako beste sektore batzuen aldean ezezaguna dirudien arren, eraikinetarako eta kaleko horniduren arloan300 enpresa baino gehiago eta 9.029 langile daude EAEn.Horietatik, hamarretik lauk klusterra osatzen duten enpresetako batean lan egiten dute. Habitat arlokoak enpresa txikiak badira ere, Habiceko presidente Yon Arratibelen esanetan, haien lantegietan 50 eta 150 bitartean daude.
Sektoreak iaz izandako emaitzen berri ere eman zuen Arratibelek atzo, Bilbon eginiko agerraldian. Guztira, 1.598 milioi euroren fakturazioa lortu zuten, Habicen bildutakoek %43,6 irabazi zutela, ia 700 milioi euro, alegia. Esportazioetan, berriz, sektoreak 163,6 milioi euroko salmentak izan ditu, eta 72,4 milioi eurokoak klusterreko bazkideek. Krisiaren hasierako galerak gainditzen hasi dira, «2008tik 2010era %5 inguruko hazkundea izan dugu, eraikuntzari lotutako enpresek merkatu berriak aurkitzea lortu dutelako».
Lurraldeka, Gipuzkoan daude Habic osatzen duten enpresa gehienak, 30 inguru. Araban, berriz, hogei bat dira, eta, Leire Aldabaldetreku klusterreko zuzendari nagusiak azaldu duenez, bulegoetarako horniduretan aritzen dira gehienak. Bizkaian, berriz, banaketa da nagusi proiektuan dauden hamabi enpresen artean.
Erakusleiho bakarra
Nazioartean saltzea da Habicen helburu nagusietakoa, eta, horretarako, hainbat irizpide diseinatu dituzte. Merkataritza plataforma bakarra osatzea da jorratutako bideetako bat, baina, horrekin batera, Basque Living ekitaldia da sektorearen apustu nagusietako bat. Gaur hasi eta bihar amaiera izango duen ekitaldian Frantzia, Belgika, Herbehereak eta Luxenburgoko adituak, banatzaileak eta kazetariak ekarri dituzte Donostiako Kursaalera, Araba, Bizkaiko eta Gipuzkoako enpresek eskaintzen dutena herrialde horietara zabaltzeko.
Klusterreko hogei enpresetako lanak «erakusleiho bakarrean daude, Basque Living markak zer eskain dezakeen ikus dezaten». Habiceko arduradunek azaldu dutenez, eraikuntzaren gainbehera gainditzeko «ezinbestekoa» dute nazioarteko merkatuetan zabaltzea.
